Ада кижи

Ада кижи

Оол кижи, адазындан чаглак дилээр
Оон артык бүзүрелдиг оорга тыппас.
Аът мунуп, девип-самнап өөредип каар,
Ада кижи чүглендирер башкызы-дыр.

Эрес бол - деп үргүлчү-ле чагып чоруур.
Эрзиг бол - деп үлегерни берип чоруур,
Адаларның угаадыглыг мерген сөзү,
Артап болбас, чырыткылыг хоойлу ол-дур.

Улус-биле эптиг-чөптүг болуңар - деп,
Улугларга хүндүткелдиг чоруңар - деп,
Өгнүң ээзи, аймак баштаан ада кижи,
Өндүр, ыдык чагыг сөзүн берип чоруур.

Оглун, кызын түрегделге черле кагбас,
Одун-көзүн хирге-чамга бораттырбас.
Орук-чолга халас кежик манап орбас,
Олут орбас, чыдын чытпас ада кижи.

Амдыы бөгүн ада сөзүн уттур болза,
Амыр-чыргал эртен даарта биске келбес.
Сагыжывыс дүн-хүн чокка дышты көрбес
Салгалывыс хоозуралга чедип болур.

Дээрде ыдык күштер-биле алыс тудуш,
Дээди сүлде эът-ботта сиңип калган,
Аал-чуртуң камгалалы болуп чоруур,
Ада кижи чуртталганың өзээ ол-дур.

Ооржак. А